مجلس الرجال رشيد الحوطي

[ وش ناقصك عن غيرك ]

اخواني الموضوع هذا من فتره وهو مضايقني وهو ( النقل للمواضيع في اغلب المنتديات وخصوصا الاجتماعيه ) اول شي انا ماني ضد النقل المفيد لكن مو بالشكل هذا !! اغلب الاعضاء في المنتديات شغلهم بس ينقل مواضيع ومايهمه موضوع فيه فايده ولا لا طبعا ماتكلم عن منتدى معين اتكلم عن اغلب المنتديات ,,

اخواني وش ناقصني عن غيري ولا عن كاتب الموضوع اللي نقلت موضوعه وش ينقصك عندك عقل تفكر فيه عندك موهبه عندك اسلوب كتابه وش ينقصك لابد عندك موهبه في مجال معين ؟؟ والأنسان لابد يكون واثق في نفسه وفي قدراته والمسأله موصعبه اختار فكره للموضوع تهم الاغلبيه واختار اسلوب كتابه واضح ومفهوم ومحد يولد يعرف كل شي حنا بهالدنيا نتعلم طبعا عندك حاجات اساسيه لابد تحطها في بالك اولا الرغبه في الكتابه ثانيا الفكره اشوف هل تهم اغلب الناس ولا بس شريحه معينه ؟ طبعا الأفضل تهم الاغلبيه وقبل كل هذا اشوف موهبتي في ايش في التصميم مثلا او النقاش ...الخ وبعدين ابدأ اكتب يمكن في البدايه مانجح في توصيل الفكره بالكتابه لكن احاول الين مانجح ,,

والشئ الثاني كثير اشوف مواضيع والله اني مافهم بعض الكلمات ولو ساالت كاتب الموضوع وش معناها يمكن مايدري لأنه منزل الموضوع
( نسخ + لصق ) وحتى لو كان فاهم موضوعه ياخي احترم عقليات الآخرين مو كل الناس مثلك بالثقافه اللي وصلت لها يعني اذا كتبت موضوع اختار عبارات يفهمها اللي مستواه التعليمي عالي واللي مستواه التعليمي قليل .. 
ولا انسى المواضيع اللي فيها شروحات خصوصا البعض الله يعطيه العافيه يطرح موضوع شرح موجه طبعا للمبتدئين واسلوبه في الشرح مايفهمه الا اللي عنده خبره وش الفايده اجل من طرحك ؟؟

وبرضه بفهم وش الفايده لما كل مواضيعي منقوله ؟ بس لمجرد اني نزلت مواضيع ويقولون والله العضو الفلاني ولا العضوه الفلانيه نشيطه ومواضيعها حلوه ؟؟ لايمكن يرتقى اي منتدى بالمواضيع المنقوله انا طبعا مو ضد النقل المفيد لاحد يفهمني غلط لكن البعض لو تفتح جميع مواضيعه كويس لو لقيت موضوع واحد هو كاتبه او تعب فيه يعني مواضيع وكم هائل من المنقول !!

احيانا ادخل موضوع واقراه اكون قريته في مكان ثاني مدري ارد ولا اقول موضوع مكرر ولا اسكت احتار والبعض يزعل ليش محد رد على مواضيعي ؟؟ ياجماعه ابتكرو اخترعو ماينقصك شي بس هي شوية شغل مخك وثقه بالنفس وجرآه وشوي شوي ماتحتاج تنقل مواضيع ليش ماتكون مواضيعك هي اللي ينقلونها مو انت اللي تنقل مواضيع غيرك ؟؟ اخواني كلنا جينا للمنتدى نبي نفيد غيرنا من خبراتنا وتجاربنا ونستفيد ..
وايضا اتمنى الكل يشارك اخوانه في مواضيعهم بالرد عليها لاتصير اناني تكتب وتبي الردود ولا ترد انت على غيرك ولا تكون مقصر ترد بدون ماتكتب مواضيع ,,

اخواني الطريقه بسيطه اجلس مع نفسي افكر في قضيه او مشكله تهم اغلب الناس واختار عنوان للموضوع يشد القارئ (والعنوان ترا مهم جدا لجذب الأنتباه) وابدا اكتب والشي اللي يجي من تعب له طعم خاص صدقوني ,,

اخواني آسف على الفلسفه الزايده لكن شئ في الخاطر وحبيت اقوله اتمنى يتسع بالكم وصدوركم لما طرحت 

والله يوفق الجميع ...